TRD'oc

La lei de l'occitan, ara impugnat pel TC, nos permèt de demandar a la Generalitat de Catalonha amb l'apuèg del Conselh Generau d'Aran de desvolopar de projèctes divèrses per promocionar socialament la lenga d'òc dins lo Principat.

A partir d'institucions ja existentas coma lo GLO (Grop de Linguistica Occitana) e los contactes amb los occitanistas del latz francés e italian (IEO, Felibres, departaments d'occitan de las universitats, politics, membres de listas de difusion sus internet, etc), prepausam la creacion d'un TERMÒc en s'inspirar del TERMCat qu'emplega d'eisinas e de protocòls de trabalh plan avançats, çò que nos permetriá de capitar una melhora normativizacion de la lenga d'òc. Seriá un bon biais de reprene lo trabalh del GIDILÒC e de bastir un diccionari en linha amb los mots que son d'actualitat! Aital poirem emplegar la lenga dins totes las environas socialas e professionalas.

Dempuèi l'arrivada d'Artur Mas e de CiU a la Generalitat, sèm dins un procés de re-estructuracion fòrta d'aquela institucion (emplegarem l'abreviacion GenCat d'internet) en reduisir son administracion e lo volum dels servicis publics, especialament l'educacion e la santat.

La crisi economica risca d'empachar lo finançament que la GenCat deu donar a l'occitan e far possible lo reviscòl de la lenga d'òc. CiU votèt favorablement la lei de l'occitan l'an passat e ara esperam una volontat clara d'apuejar l'occitanisme cultural, linguistic e politic a la Val d'Aran e una projeccion envèrs la rèsta de Catalonha e d'Occitània.

D'efièch, la crisi sembla èstre la responsabla de la manca de mejans de la GenCat per menar una PNL - oc (politica lingüistica per l'occitan) amb l'Oficina de l'Occitan en Catalonha, mas se pòdon cercar de solucions per bastir de projèctes nombroses amb pauc de moneda, car los occitanistas fan pròva de plan trabalhar per melhorar la situacion de la lenga amb pauc de mejans.

Cossí volèm fugir de la crisi economica se bastissèm pas de ligams fòrts entre Catalonha e Occitània? Bastir lo desvolopament de la Lei de l'Occitan es bastir de relacions fòrtas entre Catalonha e l'ensemble de Païses Catalans amb las regions occitanas de l'Estat francés, Monègue e las Valadas Italianas. L'occitan es la dralha que servís per convergir los criteris de sostenibilitat dins las relacions entre los dos latz dels Pirinèus e un biais eficaç per bastir l'UE. De qué servisson doncas l'Eurorregion Pirinèus Mediterranèa o la CTP?

Catalonha a una tresena lenga oficiala, l'occitan, qu'es en perilh de mòrt (sèm dins un PF / SLFT o substitucion lingüistica en fasa terminala) e que podèm pas esperar longtèmps per agir. La transmission familhara (E1) se farà pas s'avèm pas los mejans mediatics (E3) e lo contèxte social (E2) de prestigi necessari per permetre lo reviscòl de la lenga nòstra.

Es essencial que Catalonha devenga lo motor de normalizacion de l'occitan per far reviscolar l'idèa d'una nacion occitana dobèrta al mond modern, en fugir del folclòr e l'idèa de sola "lenga de cultura" perque aquò la fa esdevenir "lenga de musèu". E puèi, lo mond nos prendrà pas seriosament se arrestam de far avançar la causa nòstra e de lo far de biais creatiu! Serà aital coma poirem apuejar los politics favorables a l'occitan dins l'Estat francès que capitan pas solets a far virar lo mensprètz sistematic de la RF envèrs la lenga d'òc.

La GenCat deu comprene l'importància de las relacions transforntalièras amb Occitània tota e metre las basas per la creacion d'uns mejans de comunicacion panoccitanas (una ràdio e una television), uns escambis socials entre catalans e occitans e convertir la Val d'Aran en un endrèch de rescontre toristic catalano-occitan. En mai d'aquò, nos podèm inspirar de la eisinas tecnicas de las institucions academicas prestigiosas de Catalonha (coma l'IEC o lo TERMCAT) per modernizar lo lexic de la lenga en adaptar lo mai lèu possible los neologismes o bastir un occitan referencial per far viable la creacion de mediàs panoccitans, en fugir del localisme pròpri d'una vision sonque pluricentrica de l'occitan.

Los catalans pòdon portar modernitat al biais de fonccionar de las associacions occitanistas del latz francés e los occitans pòdon renforçar l'identitat catalana que se trapa questionada per l'espanholisme del PP.

Cal evitar que la crisi economica devenga un mejan del Podèr de las Finanças Internacionalas per contrarrotlar la societat e virar aital a un regim pauc democratic fixat pel Nòu Òrdre Mondial ont la Democracia siá una simpla virtualitat (dins la forma amb de politicians qu'an pas de podèr vertadièr per far justícia sociala) quand dins lo fons tornam riscam de virar a un retorn a l'Edat Mejana. 

Son los ciutadans los qu'an lo drèch de decidir lor avenidor, ont las leis sián cada còp mai justas, ont un occitan, un catalan o un breton pòscan parlar lor lenga liurament dins son païs en fugir de la tipica autocensura. Podèm pas permetre de nos daissar colonizar en permanéncia pel jacobinisme dels Estats centralistas. Catalonha deu luchar per son emancipacion nacionala, mas pas amb de politics ultraliberals que son al servici del Podèr de las Finanças Internacionalas e en exigir de Madrid son drèch a decidir. Espanha o França devon pas impausar la negacion de las nacions que fan partida de son territòri.

En sauvar l'occitan a la Val d'Aran e pertot en Occitània, reforçam l'avenidor social del catalan!

En apuejar politicament l'occitan, Catalonha aurà donat una leiçon a l'Estat espanhòl e francés!

A partir d'ara, la consulta de ma tèsi se fa sus :

http://trdoc.3.over-blog.es/articles-blog.html